Foto:

Column: Gait is gien pantoffelheld

Ie zollen medelieden kriegen met de speulers van Ajax. Dat Marc Overmars ze zo kot hölt. Ze kunt gien nieje zaolen meer betalen as ze de olden kwiet bint. Noe is dat in ’t geval van Davy Klaassen, den die dun in ’t haor zit, wel een bettien eigen schuld. Hee gooien ziek kicksen ’t publiek in. Toen de drank van ’t feest was uut ewâârk kwamp hee d’r achter dat met die schoene ok de zaolen weg esmeten waren en toen had hee ’t schaop an ’t drieten.

Nou ja, zult ule zeggen, dan laot ie toch gewoon een paar niejen maken. A-j zo beroemd bint as Davy dan staot de podologen in de rieje. Mar Davy zit niet zo in mekare. Hee weet dat d’r nog een tied kump nao de voetbal en dan mut Jan Splinter ok deur de winter zien te geraken. Dus hef hee de zuupotters evraog of ze ‘m de zaolen weer terug wollen sturen; de schoene mochen ze hollen. En binnen de kotste keren had hee de rechter en ietsies later ok de linker inlegzaole weer terugge.

Bie dit veurval schut mien in de gedachten hoe ik zelf as een halve zaol met kromme tenen heb elopen. Merie schuddekop nog as zee ‘tweer veur zich zut.

Die in de klompen

Ik bin al jaoren bie de podoloog, en dat hef niks met liegen te maken. Um de zoveul tied mu-j die dinge laoten verniejen. De krante schuf noe ok weer niet zo hard dat ik de zaolen dan in ’t publiek kan smieten, dus nem ik de olden altied mee nao huus.

Zo ok de leste keer. Ik heb de olden in de klompen estop, dan raken ik ze niet kwiet. De niejen had ik laoten slingeren. Dat kwam mien duur te staon. Want ik hadde met mien buurman Knelis ofepraot op ene van de veurjaorsdagen dat ’t ok op veurjaor leek, umme ’t klompenpad aover de Renderklippen te gaon lopen.

Verduld nog an toe, toen hee veur de deure stun en ik de nieje zaolen onder mien schoen wol doen, waren ze nââns te vienden. ’t Huus op de kop ezet mar vergeefs.

Tja, daor stao-j dan as Jan Klungel. Mar goed, ik menen ’t wel met de olden te kunnen doen. Die in de klompen. En dach bie mien zelf: ’t is werendig toch een Klompenpad, weurumme dan de klompen d’r niet bie an doen?

Mar vanaf de eerste tree liep ’t niet lekker. Ik liet niks an Knelis marken mar arg praots onderweg waar ik niet. Ik bin nog nooit zie blie ewes dat ik weer in de buurte van de schaopskooi raken. Lammert de herder gooien nog wat kaolen op ’t vuur deur op te marken dat ik liepe te trekkebenen. Dat had hee bie ’t rechte ende. Ene keer thuus de klompen gelieke uut en ik schrukke. ’t Bloed stun mien in de klompen. Waren die olden dan zó versleten?

Merie d’r bie en die teunen gien medelieden. Wat zeg ik? Ze gaf mien de volle laoge. De linker zaol in de rechter klompe en umgekeerd. Dat ik een soeze was, een Sunterklaos van de struukhei en zo nog wat meer.

Ik heb een wèke lang op de pantoffels mutten lopen veurdat mien de voeten weer een bettien in ‘t fatsoen zaten. En wat dan de nieje zaolen angeet? Die zaten in de binnenzak van de jasse, die ik niet meer an heb noe ‘t eindelijk veurjaor wordt.

Ontvank de groetenisse van GAIT

Meer berichten

Het lokale nieuws in uw mailbox ontvangen?

Aanmelden