Zinkens

12 februari 2026 om 10:29

In alle drie gemeenten waor un NEO krante in de bus rolt ku-j laezen dat de vertegenwoordigers in de gemeenteraod knap zenuwlappig wordt noe de verkiezingen veur de deure staot. Ik heuren aover ene die twee straoten vädder van de fietse stappen, zo was hee met de gedachten bie ’t rooje potlood. Ja, de luu heb knap last van zinkens op de mage. 

Dick Maat hef Nunspeet nog een keer terug evoerd nao de eerste verkiezings toen d’r nog boeren genog waren veur een eigen petieje. Ik denke dan terugge an de jaoren die d’r an veuraf gingen met börgemeester Langman. Dat was mien d’r ene die Brugman van de stoel of praoten. As die ’t aans niet mee eens was dan vègen hee ze de mouwe uut en niet zon klein bettien ok.

In Oldebroek kregen ze veur de leste raodsvergadering allemaole een drinkensbusse van Vitens. Niks d’r in, want ’t was de bedoeling dat ze daor thuus bie moeder de vrouw Veluws heidewater in zollen doen. Ik zag d’r een paar uut Oldebroek al een vies gezichte trekken. Ja, hei lig dichte bie heibel mu-j mar denken. Daormee had de gemeente wel een landelijk niejgien. Ik heb de boeken nao ekeken en nââns kunnen vienden dat een hele raod tegelieke efles is eworden…..

Tanja Haseloop en de nieje griffier grepen, an ewakkerd deur die dreuge flesse, nao een glas waor wel water in zat. De griffier wol metene een goeje beurte maken en begun as een raozende te dweilen. 

In Oosterwolde heb ze de smoor in dat ’t kleezje van ach en wee de behandeling van ’t darpsplan aover de verkiezings hen wil beuren. Ze bint bange dat d’r van de uutvoering niks meer terechte kump as d'r  een niej stellegien op ’t pluus geet zitten. Van raod nao kwaod meent Merie. Ze laot ’t d’r niet bie zitten en nemp van mien an dat Gerrit Jan Veldhoen de weg nog heel goed weet te vienden in ’t gemeentetehuus. Penh niet te vergèten ok dat Nanne, de opperflopper van Oosterwolde, ok bie de protesten is an escheuven. Misschiens dat hier meer heibel- dan heidewater bie edrunken kan worden.

De hele raod van Oldebroek worden tegelieke efles deur de watermaatschappieje

Luu, holt de voeten dreuge en de kop d’r bie. Groetenisse van GAIT.