Krummelen

26 februari 2026 om 18:25

Heb jullie-ule net zo veule plezier ehad bie de winterspeulen as ons? Merie en ik zaten vaste ekluisterd an de dwangbuis. Ik heb töt drie keer toe de koffie aover de taofel egooid, mar krege d’r gien straf veur, want Merie aoverkwam ’t zelfde. Op de iezers bint wie/wule heel wat mans, mar met een rotgang in die slee nao beneejen dat is meer iets veur de Alpenlanden.

Wat een pech veur die Wennemars. Net as zien vriendinnegien Suzanne Schulting mos hee met laoge hande op huus an deurdat een Chinees um van de pinnen reed.  Dat was ’t monument dat mien vrouwe met stoel en al achteraover zol slaon. 

Die beiden hadden bèter verdiend. Suzanne reej op twee peerde en dat is misschiens net wat te völle. Mar zee hef ’t gold al bie de schaorstien hangen van de veurige speulen.

Ja en dan mut ik toch deur de zoere appel hen bieten. ’t Aldermooiste veur Merie was ’t iesdansen. Alderkeizers wat een kunst. Een keer of wat aover de kop en dan toch weer goed op de bene terechte komen. Van die punten krieg ik gien heugte. Mien vrouwe weet d’r allenig van af as ’t umme de punten bie de koffie geet en had an één stuk de rebbel lös as de cijferties op ’t bret kwamen te staon.

Ze heb d’r aparte namen veur as ie twee of zelfs drie keer as een slange deur de luch vlieg. Bie de dubbele aksel vleug ze aoverende. “Dat hadden ze anders mutten doen. Links en niet rechtsumme. Kom is hier Gait, dan zal ik ’t joe uutleggen.” 

Och lieve mensen nog an toe. Mos ik zo'n tweehonderd pond opbeuren. Gaot d’r mar an staon. Merie had gien geduld en ik gien krach. Ik haöken eur en wie lagen een tel of wat later op de rugge.

Met de slee van de Knobbel maak egees gien indruk op de Winterspeulen

Merie op eur stuitien en bie mien scheuten de vlammen deur ‘t baovenlief. Hoe wie/wule weer in de benen bint ekommen is mien een raodsel. Met veule muuite een briefien op de deure met de tekst: “Wegens umstandigheden dichte.”

Affein, tegen de tied van de volgende speulen bint wie/wule wel weer fit mag ik haopen. Mar veuralsnog is 't knarpen en kraken op de Renderklippen. As 't umme gewichtige zaken geet kan ik veurtaan bèter passen. GAIT.