Fratsen

13 mei 2026 om 09:45

De media struukelt aover mekare aover de kunstbolle, die keerl achter de kompjoeter die alles van oe weet. Ik zei kottens tegen Merie dat wie daor op de Klippen gien las van heb. 

Dat was mien maot Roel nog niet zo zeker van. Hee pakken de zaktillefoon, begun te lachen en halen mien mening onderuut. Ie wilt niet weten wat de man d’r allemaole uutgooien. Humorist van de Veluwe, nuchter commentaar en een hele riedel d’r achteran.

“Nuchter? Dan hef hee oe gisteraovend niet met een jonge klaore in de hand zien staon”, mos Merie zo neudig kwiet.

Dat wie eur verjaorsdag daormee vieren zei ze d’r niet bie.

De man stak mien een kip vol veren in ‘t achterwaark. Wat dat an geet mag ik van Merie wel opslag vraogen bie de krante want a-j ’t zo lèès dan kan de hale wereld niet meer zonder mien schrieverieje veur kranten, radio en tilleviezie. Prebeer ’t maris uut en ie schrik al net zo hard as ik dat doe.

'Die hef oe gisteraovend zeker niet met een jonge klaore in dehande zien staon'

Merie worden d’r naoieverig van en niet zon klein bettien. “Mooi dat ik nog met beije benen op de grond stao. Die kerel krig van Merie niks te heuren en daormee basta.”

Dat had zee niet hardop mutten zeggen want zee dagen Roel d’r mee uut. Hee toetsen Merie van de Renderklippen in en jawel heur, daor sleug ’t dink ok op an. “Vaste vrouwelijke tegenspeuler van Gait, kritisch op ’t mannegien. Hölt de boel schone en dut de bosschappen.”

Ze gruuien een pond of wat. En vreug mien umme is goed te lèzen wat d’r allemaole nog meer worden an egeven. “Hölt Gait met beide bene an de grond. Dar dan. Noe heur ie ’t ok is van een ander. As ie noe denk dat ie allene gewichtig bint dan hei ’t bie ’t verkeerde ende.”

Ja, en dan steet oe gewicht in kiloos d'r nog egees niet bie, kon ik niet naolaoten umme op te marken. Dat had ik bèter niet kunnen doen want waor die natte dweil zo gauw vandan kwam mag Joost weten. Merie hef wel gelieke thuus alles achter 't glas en in de kas ezet. Want as d'r ene zoveule van oe weet dan mut hee volgens eur in de keuken hebben ekeken. Waor dit allemoale op an giet mag 't zeggen. Veur da-j 't in de smiezen heb wo-j besprungen deur de kunstbolle. GAIT