Gait van de Renderklippen: Zoer

Gerrit, da’s de zundagse naam veur Gait, is d’r ene die flink kan pruven. Och, daor is hee niet de enigsten in en daor kump bie dat zien Ans ok niet in een glaassien spiejt.

Mar ja, ene van de beijen mut toch riejen as ze aans nao toejakkert en dan is ‘t vermakelijk umme te zien hoe ‘t ze mekare ankiek.
‘t Eerste glaassien witte wien dat geet ongemark in de sloeke, mar dan kompde vraogtekens. Ja, umdat ze begriep dat ‘t met alcohol niet samen geet in ‘t verkeer kump’t dan op slimmigheid an. Kottens op een feessien zag ik ze nao makere loeren. Helemaole spannend wordt ‘t as ze d’r niet meer uut komp met zien beijen. Dan wordt de familie in eschakeld.

Umme Ans as veurbeeld te nemen: “Joe weet toch dat ik veurege keer mosse riejen umdat Gerrit d’r zonder nao te denken al twee in de hals had laoten slieren?” Waorop Gerrit: “Mens, dat was een maond eerder al. Ie bint vergeatachtig as ‘t oe van passe kump.” Ku-j oe veurstellen dat de res van de parmetaosie de andere kante uut kik? Behalve deluu die helemaole gien alcohol gebruuk en die ku-j daoran kennen umdat ze zitte schuddekoppen. ‘t Eerste glaassien geet bie die beien zo ongemark deur de sloeke.

Hoe dan ok, Gerrit was de klos. Ik heuren zien hässeties malen. Op de taofelwaoran zee zaten stunnen flessen wien, mar in de achterkamer ok veur bie ‘teaten wat nao ‘t borrelen zol volgen. Gerrit lachen op een gegeven moment dewiel dat d’r helemaole niks te lachen viel en d’r ok gien domieneer veurbie kwamp.”Ik gao effies een glaassien water halen”, zei hee en trök de tussendeure achter ‘m dichte. ‘t Mannegien stiefelen op de gedekte taofel an en greep in de gauwigheid een flesse umme die te vullen met een extra versnapering. Kwamp weer bie ‘t gezelschap terug met dat glaassien ‘water’ en keek Ans nog is extra an. Zo van: wie is hier noe de wiesten van ons beien. Dat veranderen op slag toe hee een eerste slok nam. Dat gezichte van um was met gien fototoestel te vangen. De flesse die hier veur witte wien had an ezien was de flesse met azien! Hee viel aldergloepens deur de mande en hef ‘t nog nooit zo mutten verzuren.

Veurdat ik ‘t vergeate: ik wens ule allemaole een mooi mar veural gezond 2026.

Groetenisse van GAIT.