Olde knappert

Merie handelt bie ons de post of. Ik kriege alleent ’t netto risseltaot onder de ogen. Mar disse keer was de posbode ’t hofpad nog niet uut of ze störmen mien kantoortien binnen met “Mu-j  dan noen toch is zien Gait.:”

Ja, dan wi-j ’t vanzelf ok weten. Een zereneuze brief van een gerenommeerd taksieibedrief. Niet ene van ‘wat zol dat’, want d’r lup daor een bonke volk rond. De brief an mien was eschreven deur een operationele manager en ’t bint gien klongels die dat achter de name meug zetten.

In die brief an beste Gait een oproep umme mien in te spannen veur disse maaaschappieje en mien beschikbaar te stellen als sjaffeur. Starker nog: ze wilt mien zelfs  gratis les geven. “Mag ik haopen op de Renderklippen, want dan kom ie gien mense tegen”, mos Merie zich d’r tegenan bemuuien.

Ie meug as ik ’t goed hebbe in gien tachtig jaor, ik bedoele met gien tachtig jaor, meer met  volk rond kachelen mar olde Berend van effies in de negentig kwam mien vertellen dat hee ok een brief van dezelfde hoge Piet had ekregen. Daor worden mien uutzunderingspositie metene weer mee onderuut ehaald.

Zol die operationele keerl noe mar lukraak luu anschrieven? Hee is hier wel aldergloepens mee uut de boch evleugen en dat is veur een taksie toch wel zo ongeveer ’t slimste wat oe kan aoverkomen. Veur kwetsbare olderen  is ’t een gerusstelling umme een bekenden an de stuurknuppel te zien, zei die manager. Veur  mien een bettien een teleurstelling mar veur Merie een hele groten. Die zag ’t al helemaole zitten, want de biebane zol aorig wat pegels opeleverd hebben. Oh ja, d’r stun ok nog in dat de gezochte vriewillige raddrééjers de werknemers van de toekomst zollen wèèn. Zie-j ’t al veur oe? Berend met zien viefennegentig sjaffeur van de toekomst? De brieve begint met “Rechtdeur met een glimlach’. In dit geval met een brede grijns op ’t gezichte, ene van oor töt oor.

Corona hef een hoop teweeg ebrach, mar zo slim as bie dit taksiebedrief heb ik ’t nog nâânt elèzen. Daor hef ’t de boel flink op de kop ezet in de baovenkamer.

Ie mossen een geldige sjaffeurspas hebben umme oe te kunnen laoten opleiden. Mar ‘t liek mien eerder dat d’r sprake is van een onpasselijke oproep. Nog afgezien van de inhold van de brief. Een mooi gebaar maken nao de gemeenschap? Nee, nao de taksiebaas, want die kump zo gemakkelijk an zien volk. Nou ja, dan wel effies bèter uutkieken an wie zon uutneudiging estuurd wordt, want met zon klongelbrief blief de taksies in de stalling staon. Met ‘t versturen is ‘t in elk geval niet goed egaon.

Groetenisse van Gait.