Gait van de Renderklippen: Verklongeld

Met ‘t older worden verdwient veul van ’t gene waor ie oe in de jonge jaoren druk umme maak. Wat zeg ik: de romantiek wördt reumatiek. En toch zak ’t nooit helemaole weg. Um de stieve harken onder ons een hantien te helpen heb de kruujeniers d’r een oplössing veur bedach. Niet ene mar een hele reeks. Moederdag, vaderdag en ok Valentijnsdag. 

De lesten steet al weer in de startblokken. Iets veur de vente, veur ’t jonge grei.  Dat denk ie al gauw a-j strammer en stiever wordt.   Is ’t al gauw gedoe.

Och a-j d’;r goed bie naodenk is d’r niks op tegen umme sommige dinge  uut de niejwetse tied aover te nemen. En veurig jaor  nam ik mien veur Merie te verrassen. Ja, met dat woord mu-j ok nog goed uutkieken, want Knelis mien buur op de Klippen  brach  Mina zien vrouwe thee en stoete op bedde en had d’r op een kaartien  bie eschreven: verassing. Och mien lieve stumper, dat maak nogal wat uut. Verassing….of ie iemand de tied uut wilt hebben….Dat gevuul hiel Mina d’r an aover en dat hef Knelis lange mutten heuren.

Dat zol mien niet gebeuren. Mar met een blad vol éten en drinken zie ik mien nog niet ordentelijk umme gaon. Dus mar bloemen besteld  en een korte tekst op een schiere angezichtskaarte. ‘Veur mien Merie van De Olde Knorre.’

Ik heuren mar niks op Valentijnsdag en ok  de dage d’r nao niet. Mar toe ik d’r effies goed bie nao ging denken sleug ik mien zelf veur ’t heuf. Kottens was d’r een pakket veur de nieje buren bie ons bezörg en in de verraltreerderigheid had ik dat huusnummer an de bloemenwinkel  deur egeven.

Dat de buren d’r  niks op uut deuden verwondern mien. Tötdat  de buurman mien anscheut.  Hee sprik gien plat en vertellen op zien Hooghaarlemmerdieks dat zien vrouw, die werendig ok Merie heet, bloemen had ekregen en of ik wisse wat een Olde Knorre was….De beiden hadden d’r een bettien onenigheid aover ekregen want de buurman is niet zon heel klein bettien nao ieverig op zien Merie. Ik hebbe um mar gien uutleg egeven. Temee draag ik de struke e zelf wel de kamer in, want een mense is nooit te old umme te leren. 

Groetenisse van GAIT.