Gait van de Renderklippen: Bekakt

’t Völt niet te ontkennen. De mens zit de natuur steeds meer dwars. Nemp noe in Oldebroek de weiers en de vogels. Die nemp ze van jaor töt jaor ruuumte of. In de raaodscommissie Ruumtegebruuk en Lééfumgeving bint ze d’r vinnig aover an’t klassieneren ewes.

D’r mut ebouwd worden in de Broeklanden, mar dat geet weer ten koste van de grutto’s, de kieften en de res van de gevleugelde vrienden. Ene van de insprékers die d’r een bonke verstand van hef, waarschouwen de raodsleden dat op disse maniere Oldebroek zien zundagse gezichte scha an dut. 

Ze begunnen een minuut of wat te late. Noe is dat op zich niet zo verwonderlijk, want ze mut eerste ’t geluud testen umme zo te zörgen da-j ’t thuus ok mee krieg wat ze d’r in de vergaderings allemaole uut flap. Mar disse keer lag ’t ietsies anders. Frank van ’t Ende van Duurzaam Oldebroek mos nog gauw wat handwaark doen. Hee kwamp op de fietse en gaf zo een signaal of dat een ende trappen de mens duurzaam hölt. Met ’t luie achterwaark in de kussens van de auto kump daor niet veule van terechte.

Frank verontschuldigen zich. Hee wees nao zien boezeroen. Daor was hee een poossien mee an ’t poetsen ewes. Want was d’r onderweggens veur evallen? Hee was bescheten deur een vogel die op ‘m ofedeuken was.

Strontvervélend veur een mense as die Frank en vrie op Oldebroek an jag.

As ik daor zo aover denken dan kom ik op de wiesheid van de diers. Die heb veule meer deur dan wie as mensenvolk denk. Ze heb een maniere evunden umme de politiek de oren te wassen. Toen ze deur hadden dat d’r ene van de raod deur de weiers fietsen zagen ze de kans schone. En dat ze daor Frank veur namen is ok weer niet zo onbegriepelijk. Hee steet met zien petieje veur een duurzame natuur. Zo ene heb de diers neudig umme eur problemen onder de andach te brengen.’t Is mar goed dat pattie luu in de commissie ’t veur de diers op eneumen heb. Daor steetr Frank beslis niet mee achteran. 

Frank zal d’r nooit achter komen wie ‘m te pakken hef eneumen, want de vogel was evleugen. Hee hef d’r nao mien dunk liever tien in de luch dan ene op de fietse.