Gait van de Renderklippen: Klerenzooi

Ie hoef geen medelieden meer te hebben met onze sportverslaggevers. Die heb van uitgevererieje NEO een dikke jasse ekregen die de kelte van de ribbekaste afhölt. Niks mis mee, mar toch…

Ie zult wel begriepen dat die letters staot veur Nunspeet, Elburg en Oldebroek, in disse volgorde. Pakkie an zo-j zo denken.
Toen de vrouwe van onze petrettieskeerl um bie ’t antrekken van zien niejste anwinst op de rugge keek barsten ze in lachen uut. “Doe uut dat dink”, zei ze tussen ‘t gieren deur.

Hee snappen d’r kats niks van en trok de wenkbrauwen een ende op. “Gien getreuzel Eddy, ’t mut noe”, jagen ze ‘m nog wat vadder op de kaste. Toen hee de hande in de lucht gooien as teken van aovergave zei ze: ’t antwoord steet bie oe op de rugge eschreven. En inderdaod: de volgorde van de plaatsen was umme edrééjd. Oldebroek veur Elburg dus en dan steet d’r zoas Eddy zien vrouwe vaste stellen met chocoladeletters NOE op de rugge.

Zie-j ’t al veur oe Gait? Ze laot een hele deuze met rotte tomaten op um lös

Ze heb een diepgaond onderzoek in esteld. Was d’r ene met de uutvoering belast die vun dat Oldbroek niet op de leste plaatse moch staon met OWIOS zo hoge op de lieste. Een ander zeg dat de beslissing bie de baas van ’t spul hef elègen. Ze waren bie de uutgeverieje an ’t rikraojen aover ’t anschaffen van de kleerage. Pättie luu wollen d’r nog een nachien aover slaopen, mar de dikkedeur zei: gien gedoe, wie doet ’t NOE!

Merie bekik ’t nog weer anders. Die snap niet dat wule d’r nog twee tel aover twiefelt.

Ze denk dat Eddy zelf in ’t spel zit. Hee zol zich met disse jasse an niet in Wezep an de draod dörven te laten zien met NEO op de jasse. Dat is namelijk ok de name van de voetbalclub waormee Wezep te maken hef. “Zie-j ’t al veur oe Gait? Ze laot een hele deuze met rotte tomaten op um lös.”

De petrettiesman schuddekop as ik ‘m d’r op anspréke. “Ik bin d’r net zo deur verras as ule allemaole”, zei hee. In elk geval hank hee met zon duffelsen de jas nog niet an de kapstok. ’t Had nog veule slimmer uut kunnen pakken as ze d’r OEN van hadden emaak, zeg noe zelf! Mar dan weer Nunspeet an de leste memme. Luu, genog daor aover. Ik verlange nao ’t veurjaor en bin vaste niet de enigsten.

GAIT.