Gait van de Renderklippen: Vreaterd

Ik zal diepe deur ’t stof mutten umme van Merie nog op een zaoterdagnaomiddag toestemming veur de voetbal te kriegen.

Dat zit zo in mekare. Berend mien buur is zuupotter van OWIOS en die liet mien weten dat ze tegen de buren van ’t Harde mossen. En dat bint leuke pötties, Gait, hef hee mien gek zitten maken. D’r  gebeurt volgens um altied wat bezunders.

Ik worden deur ’t bestuur van de Oldebroekers eneug an de bestuurstaofel en zat daor tussen Jacko van den Bosch as veurzitter van OWIOS en John Reurink, de opperflopper van gruun en wit uut ’t Harde.

Alderkeizers goeje bediening deur van de dames. Ze brachen mien de thee nog veur ik d’r umme had evraog en dat is misschiens umdat ze niet wilt dat de Vriestraat Renderklippen op de koffie kump.

Metene vreug Reurink mien umme toe te tasten op een stapel met gebak. Dat liete ik mien gien twee keer zeggen. D’r stun OWIOS op en dat heb ik mutten weten. Die van ’t Harde kloppen mien op de scholder. “Ie vuult ’t goed an Gait: wule vrèèt ze vanmiddag op”, glunderen hee. 

Ie vuult ’t goed an Gait: wule vrèèt ze vanmiddag op

Jacko keek wat zunig. Dat völt te begriepen. Wis ik veule de clubs deelt de kosten as ze tegen mekare gaot trampen en op die stapel lagen net zo veule gebakkies van OWIOS as van ’t Harde.

“Ie komp hier niet meer weg Gait a-j d’r ok niet ene van ’t Harde in de sloeke laot glieren”, zei hee. In de rus mos ik d’r dus weer an geleuven.

Mar daor bleef ’t niet bie. Nao afloop stun d’r een apperaat dat grote gehakballen maken. Ja, daor kon ik ok gien nee tegen zeggen. Mar d’r bleef d’r ene liggen en die was veur een eregast zeien ze. En veurdat ik ok mar töt drie kon tellen worden die balle mien kante opescheuven. Tsjonge wat was ik dikke. Ik konne nao ofloop amper bie de auto komen. 

Dat worden een zwaore gang op huus an, want Merie had eur beste edaon umme iets bezunders op taofel te zetten. Ik namme een paar happen mar ‘t kwam mien de oren zowat weer uut. Ik mosse dus met de billen bloot. Ik krege de wind van veuren. Merie lis mien veur hoe ‘t aoveral uut de pas lup.

Ik hebbe eur ezegd dat ‘t in Oldebroek en ‘t Harde heel vrendelijk toegeet. Wel zes gèle kaarten mar daor had de scheids d’r teveule van. Dus met Paosen niet teveule eiers. GAIT.