Gait van de Renderklippen: Niets

Daor stunne wie dan as twee manskeerls veur de tapkaste van de banke met een rieje volk veur ons.

Herman, zo heet de man veur mien,  keek achterumme en zei: “Gait, had ie ooit edach dat wie zon ende zollen ofzakken da-j veur oew eigen zoer verdiende geld nao die tapkaste op ’t darp zollen mutten? ’t Is toch bie de wilde knienen of! Dat met ’t loonzakkien vrogger was ok niet alles, mar noe da-j ’t uut de muren mutten halen is helemaole niks. Wie staot d’r al mooi een minuut of vuuve en ’t schuitn veur gien meter op.”

Ik was ’t helemaole met ‘m eens. Veuran de rieje stun een jonge van nao schatting tegen de twintig die al een steugien an ’t meratten was. Hee worden hoe langer hoe wilder, met ’t schuum op de lippen trappen hee tegen de kaste en gunk d’r vandeur onder ’t schreeuwen van woorde diet ze op zien Hooghaarlemmerdieks bargoens nuump.

Naodat d’r een paar gauw klaor waren melden zich een vrouwe die bleef met de pas gangs. D’r in en d’r weer uut. Ik wete niet hoeveule flappen of zee bie mekare vègen, mar Herman maken zich al zörgen. “Temee vange wie bot Gait. Dan zit d’r helemaole niks meer in en wordt ’t dreug brood èten jonge.” 

Achter mien stunnen een paar vente die ’t hadden aover plamuur in de kaste stoppen. “A-j ’t mar laot”, heb ik ze uut evensterd.

Naodat Herman zien zakgeld had op estreken kon ik dan eindelijk ’t bedrag ophalen wat Merie mien had op edragen. Ja, mu-j goed luustern, ie heb in een gezin d’r ene neudig die ’t geld verdient en ene die ’t uutgif, mar daor mut ik bie eur niet mee ankommen, want dan loop ik grote kans op een fleer met de stofzugerslange.

De pas d’r in, mien nummertien anslaon en….gien sjoechem. Dat gunk nog een paar keer zo. De bloeddruk gruuien met de seconden, mar ’t kapitaal bleef gelieke. 

En toen worden ik wakker. De aovend teveuren hadden wie geld veur de museumkaarte aover emaak met onze beide passen en klongel as ik binne had ik die van Merie in de knippe estop.

“Dat is nog is vlot zaken doen”, zei de vrouwe die nao Mien an de beurte was. Ik hebbe mien mar in ehollen. ‘t Is al heite genog umme oe druk te maken. 

Dus afkoelen met GAIT.