Gait van de Renderklippen: Pas Op

Ie kunt wel marken dat ’t nieje kammenet een hele bult bedenksels hef, mar gien geld genog umme dat uut te voeren.

In een huusholding geet dan de hand op de knippe, mar depolitiek zet de burger gewoonweg veur paol, in dit geval een flitspaol. Ik wete niet hoeveule as ze d’r tussen Nunspeet en Epe, bie Mariposa en an de Zuuderzeestraotweg al bie de klongels heb ehad en dat bint d’r een hele kwak heb ik mien laoten vertellen.

Ik kan d’r aover meepraoten. Umdat een ambulance sjaffeur mien in de flank reej mos ik met een ander karregien van de garage op Nunspeet an. Och, ie kent dat, ie wilt ok weten wat dat ding an kan. Ik kwam d’r een heel stel tegen die knipperen. Och ja, a-j oe met de krante bemuuit dan hei-j een bonke kennissen. Een onmundigen treuzelkonte veur mien met ‘t heuf en de pette tegen de veurruute. Hee was niet veuruut te branden. Mien bloeddruk schaot nao de tweehonderd, ik drukken ‘t gas in en gunk um schuddekoppend veurbie. Wat is noe slimmer, ene die met 150 aover ‘s Heeren wegen jach of een sjaffeur die béter op de bok van een heuiwagen kan gaon zitten.

Merie was op zien zachtst ezeg niet tevreden aover mien gedrag. Goed dan, a-j hen gaot mu-j ok terug. Ie wilt ‘t niet geleuven mar veur mien ‘t zelfdewagentien met de petteman en vanniejs een imitatie van de slakkengang. Ik staof um veurbie, maken d’r een gebaar bie waorvan ik achterof spiet hebbe. De man op lééftied wees nao de kante van de weg. Misschiens mos hee een bosschap doen. Een dag of wat later kwam ik d’r achter. D’r vielen twee bekeurings in de busse, ene veur hen en ene veur terug. Merie wees op eurbeurte met de vingers nao een tekst op de bekeuringspampieren. “Ie bint bertrap bie de Pas Op weg…. Ik denke dat ik de luu van Justitie op een idee heb ebrach want dat flitsdink steet d’r al weer een steugien. En in de verraldeweerdigheid jeug ik thuus ok nog een stuk van de brievenbussen of. Weer noa de garage van Gerard de Wilde. Die zei dat ik een wereldrecord had e-breuken. Binnen 24 uur twee keer de boel te hetter en te fletter. En verzekeren? Merie zeg dat as ik achter’t stuur zit ie van brokken verzekerd bint.