Gait van de Renderklippen: Veraltereerd

Bie de dialecclub zit ze um sprékers verlègen. Ze bint begunnen met allemaole een keer aover eur passies te praoten, mar toen d’r ene veur de dàdde keer aover Zuud Afrika begun gung d’r een stellegien veur de pauze al op huus an.

Toch slaag Hanneke de secretaresse d’r in volk te strikken dat ’t praotiezer vaste mag hollen. Wie dat van zien lang van zien leven niet meer vergéten zal is Henk uut ’t darp. Ze hadden um al lang an de kop zitten zeuren, mar hee gaf niet thuus. Dat vunnen ze bie de sprééktaalmaffia hastik spietig, want Henk zit zogezegd in de honde. Hee hef d’r zelfs ene die een hele bonke kunsies hef eleerd als hulphond bie een oldere vrouwe. Toen die de ogen dichte deud hef hee zich aover ’t dier ontfarmd.

Kottens is hee dan toch veur de biel egaon. Veurzitter Jan zei um dat a-j aover de hond hen komp da-j dat dan ok aover de start hen vlieg en dus mos hee d’r an geleuven. Toen ‘t dichte bie kwam begun hee d’r tegenop te zien. Töt an misselijkheid toe. Mar ja. An ontsnappen viel niet te denken. Hee laaien een hele bonke materiaal in de bestelwagen en daor passen Fikkie nog mar net tussen in. Toen hee de zaal binnenkwamp en al dat volk zag liep ’t um zo ongeveer dun deur de broek. Hee raken helemaole van ’t peseel en liep as een kip zonder kop met spul te sjouwen. De hond mos um redden. De kunsies van ’t dier daor had elk ene schik van. Veurzitter Jan zag um zenuwlappig hen en weer banjeren en wees op zien harloge. Hoogste tied. Gauw nog een praotiezer in de klavieren edruk en hee kon vedan.

Eers mar effies aover de opleiding van een hulphond vertellen. Mar daor kwamp hee niet varre mee. D’r worden op de deure ehouwen en twee man plietsie kwammen nao binnen. “We hebben te maken met een dier in nood. In één van de auto’s jank een dier de botten uut ‘t lief”, zeiden ze. Ik hebbe nog nooit een mense zo beduus zien kieken. Had die brave Henk zien grote vriend in de veraltereerderigheid helemaole vergéten. Hee schamen zich diepe. Mos diepe in de beugel veur uutleg. Meneer zol kommen vertellen aover dierenliefde gröalen de veurzitter. D’r kump gien tweede lezing van Henkie.

Groetenisse van GAIT.