Gait van de Renderklippen: Vergees

Merie kump net terug van ’t gemeentehuus en hef daor de kous op de kop ekregen. Dat zit zo. In de krante en op de buis van ’t kiekapperaat las en heuren zee aover de lokale politiek die grote sprongen maak. En toen kreeg zee ’t in ’t heuf umme zoiets as een Bokkesprong uut te voeren. Ze wol Petieje Gait mee laoten doen en stiefelen daorveur nao  de ofdeling Börgelukke en Boerenverstand.

Mar daor lieten ze eur weten dat ’t inschrieven veur de gemeenteraodsverkiezing al maonden geleejen was ofesleuten. Daor hef ze een ende van zich of efoeterd en hoewel ik d’r niet bie was kan ik van ofstand meevulen met de ambtenaar die ’t hef mutten ontgelden.

De instèèk van eur was te priezen. Wie kunt al een jaor of wat de deur niet meer uut op de Renderklippen um dat d’r een lèvensgrote kans is da-j Bor de Wolf integen komp en die kan oe verraojen en verkopen. Merie zol alle wandelaars met en zonder hond achter zich hebben ekregen.

Den eent of Daisey, ’t maak niet uut, zelfs de hond van de schaopshâdder heb ze te grazen ehad en daor is niks van terug evunden. 

Punt één op ’t verkiezingsprogramma van Merie stun dan ok ‘Vot met de Wolf op de Klippen’. Waor is dan toch die Schotse collie van de hâdder ebleven? Verdwenen in de wolvenschans? Ik schrikke geliek as ik dit opschrieve, want dan nuum ik een woord waor de grootste misdadiger van de Tweede Wereldoorlog mee hef van doen.

Terug nao de verkiezings. Buurman Knelis is roodgluuiend umdat hee ‘t stemlokaal uut is ebonjoerd. Hee, had expres zien paspoort thuus laoten liggen want de man op ‘t stemburo is de sikkretaris van de geitenfok en die kent hee as zien broekzak. Mar geiten of niet: hee hef zichzelf bie de bok edaon, want regels bint regels. Noe is hee niet de enigsten die ‘t rooje potlood niet hef kunnen gebruken. 

Politiek schrik de luu of mar an de andere kante jaag ‘t agressieve volk juus de politiek weer ‘t gemeentetehuus uut. ‘t Is nooit goed of ‘t deug niet mu-j mar denken. 

De stemming zol bèter kunnen dunk mien. ‘t Volk hef de penne neer eleg, mar dit bin ik nog lange niet van plan. Daor krieg ik van Merie ok egees de kans niet veur.

Ontvank de groetenisse van GAIT.