Gait van de Renderklippen: Beduus

Annegien en ik zeg de gek stunnen schuddekoppend an de kante van de weg. Merie daorentegen met beide hande wied uut mekare. Ik snappe dat ik oe/ule as trouwe lèzers van dit huukien in verlègenheid brenge as ik d’r gien verhaal an vaste knuppe.

Dat wat zich bie ons op de Klippen ofspeult is niet niej. Dat kump wat mien an geet veus te vake veur. Merie had met ’t klimmen van de jaoren niet zon zinnigheid meer umme achter ’t stuur van ons autogien te krupen. Al helemaole niet as wie buten de eigen umgeving zollen gaon. Volges mien is dat ene bonke gemakzuch, mar daor mu-j eur niet mee ankommen. “’t Is mien veus te gevaorlijk vandage de dag. Ze vlieg oe an alle kanten veurbie, trek zich niks an van verkeersborden en die flitskasten haalt gewoon niks uut. Ze betaalt nog liever as ââns te late te komen.”

Daor heb ik ’t lange mee mutten doen. D’r was gien praoten tegen. Kottens hef Annegien eur d’r nog is effies flink op an espreuken. “Moe, ie ziet dat va zo noe en dan ok begint te krukken, Stel dat d’r wat met um gebeurt? Ie denk toch niet dat ik dan op ofroep beschikbaar binnen um te halen en te brengen? Mens, ie heb de rebbel nog op de goeje plekke, oe mankeert niks an wat ze op zien Hooghaarlemmerdieks mobiliteit nuump, waorumme dan zo dwars? Temee verlup oe riebewies en daor zu-j alderkeizers veule spiet van kriegen. Ie ziet ’t an Mina van Knelis, die kump ’t huus naogenog niet meer uut.”

Merie bölken d’r van alles aoverheer, mar dat laote ik veur wat ‘t weerd was en da-s niet veule. Ze hef d’r hoe dan ok aover nao edag en töt onze grote verbazing kwam ze veurege wèke met ’t verzuukien umme de auto uut de stalling te halen. Ze was d’r klaor veur umme een runtien Renderklippen te doen. Ik heb eur ezeg dat as ’t eur menens was ze ’t wagentien zelf ok mar uut de garage mos riejen. 

En waorentig, met een woeste kop kraop ze achter ‘t stuur. Annegien en ik stunnen an de weg in ofwachting van ‘t spektakel. Ze was een steugien an ‘t mattelen en stappen toen met een hellig gezichte uut. “ Doet ‘t zelf Gait. Aj ‘t mien vraag is de accu kats laoge.”En werendig. Daor stunnen wie dan met zien beiden beduus an de kante. 

Kretenzische van GAIT.