Gait van de Renderklippen: Petertje

Bie alle rottigheid die zich elke wèke bie de voetbal veur dut gebeurt ok een bonke mooie dinge die de krante niet haalt. Nemp noe kottens de huldiging van de trouwe supporters bie OWIOS. De olde meubels worden nog een keer op epoets, zei d’r daor ene, mar portjandorie, daor geet toch een hele hoop historie an veuraf.

Petertje Tichelaar-Pletter, gistern worden ze 92, was de oldsten van ’t stel. Nog van hàtte vanof de Renderklippen! Samen met eur Hannes en de vente was zee jaoren niet van de voetbal weg te branden. En al hele maole niet toen Gert Jan as linksbuten op ‘t hoogste amateurniveau speulen. Uut nao Spakenburg, Katwiek en nuump ’t mar op. Een hastik sportief gezin.

D’r gunk gien dag veurbie of an taofel heersen de voetbal. Petertje hef wel ’s laoten weten dat bie eur thuus de tilleviezie gruun stun….Ene van de zeuns ok nog grensrechter, een andern die de jeug trainen en gaot zo mar deur.

Wat te zeggen van de zaoterdag dat Gert Jan van ’t veld worden edragen bie zien ofscheid. Op de scholders van John de Wolf van Feijenoord. Toen hef zee ’t volgens mien niet meer dreuge kunnen hollen.

Toen Hannes veurig jaor uut de tied stappen hef zee ’t slim veur de koezen ekregen. Dan denk ze nog wel is terugge an de verkiezingstijd. Eur olders wonen dichter bie ’t Harde dan bie OWIOS. Hannes moch wel aover de vloer komen mar voetballen dat mos bie gruun en wit. In later tied is hee toch aover estap en hef jaoren in ’t tweede van de Oldebroekers evoetbald.

De oldste supporter dan, daor heb wie ’t aover, maken zich ok verdienstelijk deur bie de club schone te maken. Alles liek en recht, spik en span, daor kon menigeen een puntien an zugen.

Ze was al een tietien niet meer op ’t sportpark ewes mar met al die olde vrinden umme zich heer hef zee net zo genoten van de huldiging as van de koffie met gebak.

Ze raken d’r wa-j nuump van in de vierde jeugd. Zelfs Merie stik de duum umhoog. Die lup nog genog deur ’t huus te banjeren umme niet sportstief te worden. 

Gien gedoe aover virussen, al is dat niet veule minder as vier russen. 

Groetenisse van GAIT.