Gait van de Renderklippen: Prikje

Een prikje is niet veur iederene iets umme de scholders bie op te halen. oien schoonmoe, die vuuf kinder op de wereld hef ezet, ging bekant tegen de vlakte veur een spuite. Anderen heb d’r de  meeste last van as ze de mouwen op mutten stropen. Ik kirege d’r binnen een wèke tweeje: ene tegen de Corona en ene tegen de influenza met een breurtien in Mexico.

Veur Corona bint een hele bonke zestigers niet zo te vienden. As ’t umme de griep geet is d’r een stuk minder terugholdendheid. Ik zal oe vertrellen dat op sommige plekken een rieje stun töt umme de bocht heer en nog wat vádder. Alderkeizers nog an toe. Ik wete niet of de huusartsen per spuite betaald wordt, mar dan kunt ze d’r nao ene dagweer een jaor lange tegen.

’t Was bbie pattie luu ok weer een kwestie van veur krupen. Van de fietse stappen, met grote stappen op iemand in de rieje of diet ze een dag van teveurten  nog hadden ezien, en d’r mooi tussen gaaon staon umme zo de boel veur de gek te hollen. Ik wete niet of ’t aoveral zo toe geet,mar toen ik an de beurte was stun d’r een kiste met appels . Iederene  

Noe lag d’r naos die kiste een mandarijn. Ik kon ’t net laoten umme daor een vraoge aover te stellen.l “Wie krig die mandarijn? Is dat veur iemand die de corona én de huuspriki za-k mar zeggen tegelieke löt in pietsen?”.

Nee, heuren ik van de assistente. Die vertellen mien dat ’t stuk fruit uut de broodtrommnel was erold en eur egees gien tied was egund umme die op te maken. In ieder geval kon ik ok met een bellefleur in de broekzak op huus an.

Laot ik noe vergangene wéke nao de beide prikken ’t ziekenhuus in drééjen? Nog wel ’s nachtens. Ik heb de huusarts ebeld en evraog of ze tussen al die spuiten umme iets tegen te hollen d’r ok een stel hadden liggen die de broerdigheid bevordert. “Gait, noe mu-j is goed luustern. As wie oe niet in hadden in eënt  dan hadden ze oe op kunnen rapen.”

Daor hol ik ’t dan mar op. Met nien goeje condietsie – ik kan zelf de broek an en uut kriegen – was ik al weer gauw bie moeders. Ontvank de groetenisse van GAIT.