Column Gait: Hotsknots

De buurtbusse is niet meer weg te denken. Een bonke volk hef d’r gloepens veule gemak van, want de sjaffeurs brenk oe aoveral waor a-j mar hen wilt. In de gemeenteraod van Oldebroek zei d’r ene al dat ’t vaker laoten riejen van ’t vervoermiddel een fikse biedrage zol betekenen an veilig verkeer.

Noe mu-j dat ok weer niet aoverdrieven. De verkeershobbels speult parten. Ok al nemp de bestuurders nog zoveule gas terug: ie wordt a-j achterin zit toch deur mekaar eschud.

Veur ’t meeste volk is dat niet zo bezwaorlijk, mar a-j bettien gevulig bint veur wagenziekte dan geet de lol d’r van of. 

De colleezjes van bee en wee in Elburg en Oldebroek bint niet van ach en wee, dus toen Kuna ze uutneudigen veur een rittien umme ’t zelf is uut te proberen stunnen ze volges mien in de rieje. Hoe dan ok viel Henk Wessel de eer te beurte umme van ’t pluus naor de achterbanke te verhuzen.  Henk, toen nog wetholder, was nao zoveule jaor schokvrie zo-j kunnen zeggen.

De sjaffeur van dienst zag zien kans schone. Of de wetholder drempelvrees had? ‘Nee, dat had e niet. De burgers heb eerder de vrees um aover de drempel van ’t gemeentetehuus te stappen”, mut hee ezegd hebben.

Mar hee was natuurlijk gewend umme veurin te zitten en kwmp d’r al gauw achter dat de leste plekke toch ietwat anders an vuult. Luu die d’r getuge van bint ewes meldt mien dat hee al nao een  kwartiertien pips umme de neuze was. Zo ongeveer van ene die wat hee eerst in de broek had effies later in de nek vulen. Dus Henk wis niet hoe gauw as hee weer naor zien vertrouwde plekke veurin kon verkassen.

Een steugien d’r nao is de record wetholder weer gewoon raodslid eworden. Kwaodsprékers meent te weten dat hee daor op an edrungen hef umme een jaorlijkse herhaling van zon proefrittien te veurkomen. Noe weet Gait wel béter, mar één ding is zeker: Wessel hef in zien hele lange polietieke bestaon nooit zoveule hobbels mutten nemen as die ene naomiddag. Ik bin d’r van aovertuug dat ze in Elburg en Oldebroek wel flink nao denk veurdat ze d’r weer een nieje drempel bie lek. Mar umme oe gerus te stellen: as gewone passagier krieg ie niet van doen met zoveule opschudding en ze holt d’r noe bie de Buurtbusse goed rékening mee.