Gait van de Renderklippen: Zwaorgewichten

Hoe dichter a-j komp bie Zwolle, griep gemeenten nao de tolle. Daor mos ik an denken toen ik kottens in disse krante las dat Elburg, Oldebroek samen met Heerde en Hattem an ’t klassieneren bint aover samenwarken. Wat zeg ik: misschiens wel de kop in ene zak te stéken. Ze spréék d’r aover in wat ze ’t Thorbeckeberaod nuump. 

Ja wach effies, daor zit meer achter. De liberalen krieg landelijk klap nao klap en met Thorbecke in gedachten wilt ze noe de scha zien in te halen. Ze hadden ’t ok de Dreesclub kunnen numen, mar daor hef kennelijk gien ene op de noordoost en noordwest Veluwe zinnigheid an.

Mar hoeveule luu bint d’r niet die elke maond dankzij de olde Willem geld op de banke escheuven ziet.

’t Völt mien op dat Nunspeet nog op de wachtlieste steet. Die maak ze al wel lekker met ’t toespeulen van de notulen. ’t Geet umme ambtelijk aoverleg. Zollen die niet in de smiezen hebben dat het op ene hoop gooien van die viere d’r toe kan leiden dat d’r juus, volk teveule is en passeneel temee an de kante kan worden ezet? Dat ze ’t met de hulpe van Zwolle met veule minder luu of kunt? 

Veuralsnog speult ’t zich of op ’t niveau van de börgemeesters en de gemeentesecretarissen. Mar ja, dat nemp al gauw hand aover hand toe, zo as een petrettien bie ’t stuk an gif. Steet dat veur händig? Niet veur d’r met de hande ofblieven vanzelf. Noe nog viere, mar as ze meer bie de pinke komp heb ze met Nunspeet d’r bie een handvol.

Misschiens een actie van Geef ons de vuve! Anderen bint d’r kats tegen. Die meent dat a-j ze een hand geef ie de vingers nao mutten tellen. Veuralsnog hef ’t nog gien hande én voeten ekregen, mar tegen de hâârfs haop ze d’r al een steugien vadder mee te wézen. Hoe of dit in Den Haag völt? Joost mag ’t weten. Ie bint vanzelf wel met hande ebunden an wat ze daor met ’t land veur heb. Merie is niejsgierig, wil dat ik de hand d’r op legge. In elk geval völt de Vriestaat Renderklippen d’r nog veur de helfte buten. Jan Nathan Rozendaal zal flink mutten schuven umme ons de neutraliteit uut hande te laoten geven. Ontvank de groetenisse van GAIT.