Gait van de Renderklippen: Ziende blind

‘T is een vremp gevuul umme te léven in een wereld rondumme oe waorin alles wit is en die van mien een antal uren op een dag pikzwart. As schriever van een column is ’t oe vergund um zo noe en dan zwart-wit te denken en as zodanig kump ’t mien zo in ’t begin van ’t jaor niet slecht uut.

Mar veurdat ik vadder of dwale: ’t hef daormee te maken dat Merie en ik zeg de gek egrepen bint. Nee, effies wachten, niet gelieke 112 bellen, wie bint egrepen deur de niejste griep die vremde kronkels maak.

Bie mien nog ’t slimste. Beide poesterig in de pokkel en sloerig in de rakkert, hoesten as een hijskrane. Mar bie mien kump daor bie dat ik hele delen van de dag de ogen niet lös kriege. Volgens Merie niet zo verwonderlijk, want d’r zol heel wat wézen waor ik de ogen niet veur wil openen.

Mar da’s de grootst meugelijke onzin: ik kriege letterlijk de oogleden niet van mekare en stao in ’t duuster te loeren.

Eerkijk is eerlijk, dankzij de vrouwe zie ik dan toch ‘t lich weer. Die haalt mien een keer of wat pruttel uut mien kiekers. 

’t Is niet verkeerd een uur of wat op een dag Merie niet umme mien hen te zien, mar ik kieke wel uut um dat hardop uut te spréken. Ik réken op ule stilzwiegen.

Ik hebbe gruuiend respect veur mensen die blind bint en zich met die handicap toch een weg weet te vienden. As ik ’s nachts veur een sanitaire stop allenig op de tas gao nao ’t kleinste kamertien dan kwak ik aoveral tegen an. Gister sleug ik steil achteraover met as gevolg een eerstegroads bult op de kop van de klap tegen de lampenkaste en een onderrugge die protesteert as de fanatiekste veeholders onder ons. Niet de brug, mar de rug van de zuchten.

D’r kump egees niet meer wat uut de vingers, energie as die van een kapotte lampe. 

Och, mensen wat bin ik blie met de buurte die mien al een keer of wat ’t hofpad sneevrie hef emak zodat de posbode ons nog kan vienden.

Respect ok veur die mensen, want dage lang in de kou met de angst dat oe de bene onder t dikste deel van de rugge weg slaot, gaot daor mar is an staon. Dat geldt ok de bezörgers van disse krante.

Groetenisse van GAIT.