Gait van de Renderklippen: Klongel

As oe vrouwe aover malheur an de fietse zit te drammen, trap d’r dan astoeblieve niet in. Ik zal ’t joe verklaoren. Merie hef mien d’r mooi mee te pakken ehad. As ’t weer d’r nao is wilt wie nog wel is entien met ons trapkörregien runtien maken. De ene keer wat vâdder dan de andere. Net naodat zee d’r zinnigheid in hef.

Kottens haww weer zon dag met tegen de achttien graoden en ik stellen dus veur ’t iezeren geval an te trappen. Mar ik had al gauw deur dat mien vrouwe liever thuus bleef.

Hoe ik de zunne ok prees, ik krege eur niet in ’t zadel. 

“Weet ie Gait, ie kunt makkelijk praoten, mar ik hebben een akelig klein zadeltien en daor krieg ik al gauw zeerte van in ‘t dikste deel van de rugge.”

Ik stun op ‘t punt umme te zeggen dat zoiets gien wonder is veur vrouwluu met een butenmodel achterwâârk, mar dat heb ik nao elaoten.

Ik drèèjen de zituaatsie umme. 

“Deerne, ik heb d’r alle begrip veur. Weet ie wat wie doet: nao de fietsendokter en een fatsoenlijk zadel anschaffen.”

Ze stemmen d’r heel gauw mee in en dat had mien uut de dommel mutten halen.

Keus genog en veur zes tienties had ik eur toch mooi in beweging ekregen.

Mar toen ze langs het veurraod giespelen bleef ze staon bie vuurrroojen. “Mooi hè, mevrouw. Dat is een elektriesen. Daor hoef ie egees niet op te trampen. As ik ’t zo bekieke is ’t helemaole iets veur oe.”

Muujluk trappen met een butenmodel achterwâârk op een klein zadeltien

Merie verrassen mien met de vraoge of ze d’r een proefrittien mee moch maken. De kammeraod van de fietsen was mar al te geerne bereid umme eur in ’t zadel te heisen. Ik hebbe niks ezeg, want ik was d’r van aovertuug dat ze binnen de kortste keren tegen de vlakte zol gaon, mar dat ku-j net denken.

Merie en die gaperd hadden mekare gauw evunnen. Gien zadel van zestig piek, mar een elektriese fietse van 2500 euro. Merie is hard- mar ok goedleers, want ze zetten d’r een gang in van jewelste.

En zo viel Gaitman helemaole van ‘t peseel, buten aosem, de deur binnen. “Zo val ie mooi of”, zei ze, mar ik zol liever hebben ehad dat ze mien met wat anders op ezadeld had. 

Groetenisse van GAIT.